Жылу маусымын бұзғаны үшін Шахтинск ЖЭО-ға 400 мың теңгеге жуық айыппұл салынды

Шахтинск қаласының тұрғындары қаңтар айынан бері пәтерлеріндегі суыққа шағымданған.

Ал ЖЭО басшылығы мен Шахтинск қаласы әкімдігі кәсіпорын тұрақты жұмыс істеп жатыр деп сендіргенімен, облыстық Атомдық және энергетикалық қадағалау және бақылау департаментінің жоспардан тыс тексеруі мұны жоққа шығарды.

«Жоспардан тыс тексеру қорытындысы бойынша мыналар анықталды: «ЖЭО «Шахтинскжылуэнерго» ЖШС-де 24.02.24 пен 22.02.24 аралығында жылумен жабдықтау жүйесінде бекітілген температуралық кесте сақталмаған. Энергетика министрінің бұйрығымен бекітілген Электр станциялары мен желілерін техникалық пайдалану қағидаларының 579-тармағының талаптары бұзылған... Осылайша, Қазақстан Республикасының Әкімшілік құқық бұзушылық туралы кодексінің 300-бап бойынша әкімшілік құқық бұзушылық жасалған» деп қорытындылады инспекторлар.

Олар әкімшілік құқық бұзушылық туралы хаттама жасап, «Шахтинскжылуэнерго» ЖШС-не 369 200 теңге айыппұл салды. Компания айыппұлды төлеп қойған.