Жылқы іздеуге шығып жоғалған 14 жастағы жасөспірім табылды

Қостанай облысында жоғалып кеткен 14 жастағы жасөспірім табылды. Кирилл Дукарт 3 қаңтар күні сағат 10:00-де үйір жылқы іздеуге кетіп, қайтып оралмаған.

Оны іздеуге Төтенше жағдайлар қызметкерлері, кинологиялық қызмет көрсету орталығының қызметкерлері, еріктілер мен жергілікті атқарушы органдар шықты. 110 адам мен 26 техника жұмылдырылды.

Жылқы іздеуге шығып жоғалған жасөспірім Майкөл ауылдық округіне қарасты Шеминовка ауылында түннің бір уағында табылған. Alau.kz порталының хабарлауынша, қарлы боранның кесірінен Кирилл адасып, қайтар жолын таппай, бірінші кездескен үйден жылынып алуды сұраған.

Олар жоғалған адамның табылғаны туралы кейінірек қайта хабарлады. Баланың жағдайы тұрақты.