Жыл басынан бері Қазақстандық жолдар 500 рет жабылды

2021 жылы екі айда ауа-райының қолайсыздығына байланысты Қазақстанның жолдары 539 рет жабылды. 500-ге жуық көлік қар құрсауынан құтқарылды, деп хабарлйды ORDA Индустрия және инфрақұрылымды дамыту министрлігінің баспасөз қызметіне сілтеме жасап.

Атап айтқанда, қарлы боран мен желдің әсерінен жүргізушілерге нашар көрінетіндіктен жол учаскелері 329 рет жабылды. Көктайғаққа байланысты 78 рет, температураның төмендеуіне байланысты 34 және көршілес аймақтардағы көлік қозғалысының шектелуіне байланысты 98 рет шектеу қойылған.

Министрліктің хабарлауынша, Ақмола облысы жолдардың жабылуында көш бастап тұр. 2021 жылдың екі айында жолдар 111 рет жабылды. Екінші орында 66 рет шектеулер енгізілген Шығыс Қазақстан облысы тұр.

Жалпы алғанда, қыс мезгілі басталғалы бері 500-ге жуық көлікке көмек көрсетілді, оның 109-ы жылы жәшіктерге, ал 800-ден астам адам «Казахавтодор» ЖШС жылу пункттерінде орналасты.

Өткен қыс маусымының осы кезеңінде елдегі жолдар 676 рет жабылған.