Журналист Молдабековке шабуыл: полиция тергеуді тоқтатты

Журналист Данияр Молдабеков бұл шешімге шағым түсірмейтінін мәлімдеді.

Полиция Алматыда журналист Данияр Молдабековке жасалған шабуылға қатысты тергеуді тоқтатты, деп хабарлайды Orda.kz . Бұл туралы ол өзінің «5 қаңтар» телеграм-каналында айтты.

Сотқа дейінгі тергеп-тексеру Қазақстан Республикасы Қылмыстық-процестік кодексінің 45-бабының 7-бөлігінің 1-тармағы «Қылмыстық құқық бұзушылық жасаған адамның анықталмауы» негізінде тоқтатылды.

«Ақпан айының соңында маған жасалған шабуылға қатысты сотқа дейінгі тергеу тоқтатылды. Теориялық тұрғыдан бұған қайта  шағымдануға болады, бірақ мен одан ешқандай мағына көріп тұрған жоқпын. Бұдан былай тек аруақтардың қорғауына үміт артамын. Басқа не қалды? Жұмысты әрі қарай жалғастырамыз, әрине...» деп жазды Молдабеков.

Еске салайық, 22 ақпан күні таңертең белгісіз біреу зерттеуші-журналист Данияр Молдабековке үйінің кіреберісінде шабуыл жасаған. Жәбірленушінің айтуынша, шабуылдаушы оны тонауға немесе ара қатынасын шешуге  әрекет жасамаған.