Журналист Михаил Козачков үйқамаққа ауыстырылды

Бұл туралы Козачковтың қорғаушысы Жеміс Тұрмағамбетова мәлімдеді.

Онымен тағы бір танымал қазақстандық журналист Вадим Борейко сөйлесіп, бұл жаңалықты өзінің Telegram-арнасында жариялады.

«Мен жаңа ғана құқық қорғаушы Жеміс Тұрмағамбетовамен сөйлестім. Ол журналист Михаил Козачковтың бұлтартпау шарасы өзгертілгенін айтты: Козачков СИ-18 тергеу абақтысынан үйқамаққа ауыстырылды»  деп жазды ол.

Еске салсақ, журналист Михаил Козачков 18 желтоқсан күні кешке Қоспаевтың ұйымдасқан қылмыстық тобына қатысы бар деген күдікпен ұсталды. Aнтикор Козачков «рейдерлік басып алу құрбандарына ақпараттық шабуыл жасады» деп мәлімдеді. Журналистің адвокаттары пәтерді тінту заң бұзушылықпен жүргізілгенін және оларды тінту жүргізіліп жатқан пәтерге кіргізбегенін айтқан болатын.

Жағдайды «Әділ сөз» сөз бостандығын қорғау халықаралық қоры да назардан тыс қалдырған жоқ. Олар процессуалдық нормалардың сақталмауына алаңдайтындарын айтты, адвокат Анна Веретельникованың хабарлауынша, тінту адвокаттың қатысуынсыз өткен.

Олар сондай-ақ Қаржы мониторингі агенттігі таратқан  баспасөз баяны кінәсіздік презумпциясын және Қазақстан Республикасы Конституциясының 77-бабын бұзатынына назар аударды: «Адам оның кінәсін сот танығанға дейін және заңды күшіне енген үкім шыққанға дейін  қылмыс жасағаны үшін кінәсіз деп танылады».

20 желтоқсанда Алматының тергеу соты Козачковты 2 айға 18 ақпанға дейін қамауға алу туралы шешім шығарып, кеше бұлтартпау шарасы үйқамаққа өзгертілді.