Жұрттың көзін байлап, несие алдырған ақтөбелік емші ұсталды

Ақтөбе қалалық соты аса ірі көлемде алаяқтық жасады деген күдікке ілінген халық емшісін қамауға алуға рұқсат берді. Әзірге полицияға 52 жәбірленуші әйелдің арбауына түсіп, несие алғанын айтып хабарласқан, деп мәлімдейді Orda.kz.

Емші несиені өзі төлейтініне жұртты сендірген, бірақ бұл ақша қызының емі мен мешіт құрылысына қажет болған-мыс. Кейбір шағымданушылар өзін көндіру үшін гипноз қолданған болуы мүмкін дейді. Келтірілген шығынның жалпы көлемі 160 миллион теңге.

Шағымдардың көбеюіне байланысты күдікті одан әрі тергеу үшін екі айға қамауға алынды. Полицейлер оның әрекетінен зардап шеккен азаматтарды Әйтеке би көшесі, 21 мекенжайы бойынша №3 қалалық полиция бөліміне хабарласуға шақырады.

Қылмыстық тергеу жалғасуда. Жәбірленушілер келіншектен келтірілген шығынды өтеуді және өздеріне берілген несиелерді қайтаруды талап етеді.

Жәбірленушілер арасында негізінен күдіктіге емделуге келген әйелдер бар екенін бұған дейін жазған болатынбыз. Тергеу барысында емшінің түрлі сылтаулармен клиенттерді несие алуға көндіргені анықталды. Алынған қаражат бір миллионнан 18 миллион теңгеге дейін болған.