Жұртшылық Жезқазған-Қызылорда тас жолындағы көктайғақ жағдайын сынға алды

«ҚазАвтоЖол» балансындағы Жезқазған-Қызылорда тас жолының жағдайы мәз емес, деп хабарлайды Orda.kz.

Қазақстандықтар Жезқазған-Қызылорда тас жолындағы көктайғақтың себебін «ҚазАвтоЖолдан» көруде. 

«Біз Жезқазған-Қызылорда тас жолының бойында тұрмыз. Бұл «ҚазАвтоЖолдың» балансындағы жол. Демек, өздеріңіз көріп отырғандай, «ҚазАвтоЖол» тек жол ақысын алып, тек айыппұл өндірумен ғана айналысады. Көрдіңіз бе, бұл жол тайғақ, яғни пайдалануға жарамсыз. Құм себілмеген, көлік иелеріне жағдай жасалмаған. «ҚазАвтоЖол» қайда қарап отыр деген сұрақ туындайды», – деп сұрады ғаламторда тарап жатқан видеодағы жігіт.

Редакция түсініктеме алу үшін Көлік министрлігі баспасөз қызметтеріне және «ҚазАвтоЖолдың» өзіне хабарласты.

«2024 жылғы 16 желтоқсанда Ұлытау өңірінде ауа райының нашарлауына байланысты жолдарда көктайғақ болды. «KAZhService» филиалы инертті материалды толтыру жұмыстарын жүргізді. Жол қызметтері тәулік бойы жолдарды қысқы жөндеу жұмыстарын жүргізеді» деп хабарланды.