Журналист Жәмила Маричеваның адвокаты тағылған айыпты алып тастауды талап етті

Алматыда журналист Жәмила Маричеваның соты онлайн режимде басталды. ProTenge жобасының авторына «Жалған ақпарат тарату» бабы бойынша айып тағылды, деп хабарлайды Orda.kz порталы.

Іс әкімшілік құқық бұзушылық істері жөніндегі ауданаралық мамандандырылған сотында қаралды. Маричева ProTenge телеграм-каналында жарияланған ақпараттың дұрыс екенін, қоғамдық тәртіпті, азаматтардың құқықтары мен мүдделерін бұзбайтынын айтып, жасалған хаттамамен келіспейді. Сондай-ақ ол бұл посттың полицияның назарын не үшін аударғанына таң қалды. Айыптаушы тарап журналистке қарсы ProTenge қаңтардағы Азаттық радиосына қолдау білдірген жазбасына байланысты талап қойып отыр.

Маричева 24 сәуірде кешкі уақытта жүгіріп жүрген кезінде ұсталды. Полиция бөлімшесіне жеткізіліп, хаттама жасалып, босатылды. Сот отырысында Жәмила полицияның сол күні оның  қайда жүргенін қалай блігеніне қатты наразы болды. Оған бұл туралы алдын ала хабарланбаған және онымен жедел хабар алмасу немесе қоңырау арқылы байланысуға әрекет жасалмаған. Ол полиция оны қадағалап отыру үшін арнайы технологияны қолданды деп болжайды, өйткені оның кешке жүгіру жоспары туралы ешкім білмеген. Бірақ бұның не үшін қажет екені белгісіз.

Адвокаты Әсел Тоқаева оның әрекетінде әкімшілік құқық бұзушылық құрамы жоқтығын алға тартып, сотты журналистке қатысты процесті тоқтатуға шақырды.

Сондай-ақ адвокат қамауға алу және хаттама жасау кезінде конституциялық құқықтарын өрескел бұзғаны үшін Бостандық ауданының ІІБ қызметкерлеріне қатысты сот шешімін шығаруды талап етті.

Олар бұған дейін жалған ақпарат таратқаны үшін журналист Асхат Ниязовты сотқа бермек болған. Оның айтуынша, ол «Азаттық» радиосындағы әріптестерін қолдап ProTenge басылымын қайта жариялаған, сол үшін оның үстінен жала жабу бойынша әкімшілік іс қозғалған. Қылмыстың айғағы болмағандықтан іс тоқтатылды.