Журналист жалаңаш бейнетүсірілімі үшін мемлекеттік органнан өтемақы өндірді

Заңсыз түрмеге сүйрелеп,  қамауға алу кезінде жалаңаш бейнетүсірілім жасағаны үшін ҚР Қаржы министрлігінен журналист Сандуғаш Дүйсеноваға 100 мың теңге өтемақы өндірілді, деп хабарлайды Orda.kz.

Естеріңізге сала кетейік, Orda.kz тілшісі 2023 жылдың 11 тамызында кешке қарай уақытша ұстау изоляторына қамалды. Оған Қазақстан Республикасы Қылмыстық кодексінің 147-бабы («Жеке өмірге қол сұғылмаушылық және Қазақстан Республикасының жеке деректер және оларды қорғау туралы заңнамасын бұзу») бойынша айып тағылды. 

2022 жылдың мамыр айында журналист ауылдасын суық қандылықпен атып, екі жасар баласын жаралап, кейін қылмыс орнынан қашып кеткен қылмыскерді іздестіру туралы хабарлама жариялаған. Жазбада кездейсоқ қылмыскердің жеке мәліметтеріне жататын - салық төлеушінің сәйкестендіру нөмірі жарияланып кетеді.

Осы жазбаның арқасында қылмыскер табылып, 16 жылға сотталады. Ол түрмеде жатқан бір жарым жылдан кейін ғана  өзінің жеке деректерін құпия мәліметтерге жататыны есіне «түсіп», жеке өміріне қол сұғылмаушылық бұзылғаны туралы арыз береді.

Осы оқиғаға байланысты жауап алу кезінде Сандуғаш Дүйсенова құзырлы органдар тарапынан заңсыз әрекеттерге ұшырады. Олар Сандуғашты түгелдей шешіндіріп,  анадан туғандай жалаңаш күйінде бейнежазба түсірді. Артынша Талдықорған қалалық полиция бөлімінің қызметкерлері өз әрекеттерін іздестіру шараларын жүргізу қажеттілігімен түсіндірді.

Журналист осы өрескел қорлықтары үшін жергілікті мемлекеттік органдарды сотқа беріп, жүз мың теңге морольдық шығын өтетіп алды. Әрине, журналист үшін ақша маңызды емес екені белгілі. Дегенмен ол осы ісімен құзырлы органдардағы шенеуніктер мен полиция қызметкерлерін осындай кереғар әрекеттері үшін заң шеңберінде «орнына қоюға» болатынын дәлелдеді. 

Сандуғаш сот арқылы жеңіп алған 100 мың теңгеге қаңғыбас иттер мен мысықтарды тамақтандырды.

Естеріңізге сала кетсек, Сандуғаш бүкіл әлемді шарлаған «Дәуірдің соңы» фотосуретінің авторы ретінде танымал. Бұл суретте 2022 жылғы қаңтар оқиғасы кезінде Талдықорғанда бұрынғы президент Нұрсұлтан Назарбаевтың алаңда құлап жатқан ескерткіші бейнеленген. Бұл сурет үшін Дүйсенова MediaCAMP Award 2022 халықаралық байқауының жеңімпазы атанды.