Журналист төңкерістен Алматыны сақтап қала алмаған министрді сынға алды

Журналист Сәуле Әбілдаханқызы елдің тыныштығы кеткен сәтте Ішкі істер министрлігі өз жұмысын дұрыс атқармағанына сенімді. Ол министр орнынан кетуі тиіс дейді.

«Басқа-басқа, Ішкі істер министрінің орнында қалғанына таңмын. Қанша дегенмен, Мәсімовтың органымен тығыз байланыстағы мекеме емес пе? Алматыны қорғай алмаған, тіпті шағын ғана әкімдікті қорғай алмаған, өртке орануына жол берген министр де, қала әкімі де, қалалық департамент басшысы да өз еріктерімен отставкаға кетсе әлдеқайда абыройлырақ болар еді-ау... Алаңның төрт бұрышынан саңқылдап тұратын колонкалар қойып, халықты әкім бастап, ДВД басшысы қоштап, сөзге шақырғанда, мұншалықты болмас еді... тіпті, біреулер атып тастайды деп қорықса, бункерде жасырынып отырып сөйлесе де, алдымен оқтан бұрын СӨЗ айтылуы керек еді... Халыққа сөз беру керек еді... Сөздің киесі бар... Бір ауыз сөзбен соғысты тоқтатуға да, бастамауға да болады» деп жазды Сәуле өзінің Facebook парақшасында.