Журналист Айгүл Өтепова психдиспансерден шықты

11 желтоқсанда журналист Айгүл Өтепова Нұр-Сұлтандағы психиатрия орталығынан шықты. Бұл ақпаратты Өтепованың адвокатына сілтеме жасаған Азаттық Радиосы хабарлады.

Қыркүйек айында Айгүл Өтепованың үстінен 405-бап бойынша ("Тыйым салынған ұйымның жұмысына араласу") қылмыстық іс қозғалып, үйқамаққа алынған еді. Журналистке "Facebook желісінде билікті сынаған жазбалары үшін" айып тағылып отыр. Блогер Facebook желісінде соңғы жазбаларының бірінде биліктің індетпен күрес шараларын сынап, карантинде отырған жарты жыл ішіндегі "өзгерістер" туралы айтқан еді.

Өтепованың үстінен қозғалған қылмыстық іс аясында тергеушілер өтінішімен оның "ақыл-есін тексеру мақсатында" медициналық сараптама тағайындалып, журналист қараша соңында психдиспансерге жіберілген еді. Жақтастары мен құқық қорғаушылар істің саяси астары барын айтады.

50 жастағы Айгүл Өтепова newtimes.kz басылымында журналист болып еңбек еткен. Ол өзін 2015 жылы Қазақстан президенттігіне үміткер ретінде ұсынып, кейін бас тартқан еді.