«Жұмыстан қуады деп үміттенемін»: Димаш автобус бағасын 500 теңгеге өсіруді айтқан сарапшыны сөкті

Димаш Құдайберген қоғамдық көліктің жолақысын 500 теңгеге қымбаттату туралы ұсыныс жасаған Олжас Байділдинов пен оның ана тілі жөніндегі пікіріне қатысты өз ойын ашық айтты, деп хабарлайды Orda.kz.

Ол әуелі қазақ халқының әлемдегі барлық тілді құрметтейтінін айтып, энергетика саласының сарапшысы Олжас Байділдиновтің өз тілінен ұялатынын, қазақ тілін білмейтінін сөкті.

«Біз, қазақ халқы, әлемнің барлық тілін құрметтейміз. Бірақ құрмет ең алдымен өзіңнен басталады. Өз тілінен өзге біреудің ризашылығы үшін ұялатын адам сөзін емес, тамырын жоғалтады. Олжас, сені арандатушылығың үшін жұмыстан қуады деп үміттенемін. Қазақ тілінде жазған жоқпын, өйткені сен қазақша білмейсің», — деді Димаш Құдайберген. 

Еске сала кетсек, Олжас Байділдинов бұған дейін Алматы мен Астана қалаларында қоғамдық көліктің жолақысын 500 теңгеге дейін қымбаттату жайлы сөз қозғаған болатын. Бұл сөз әлеуметтік желілерде тарап, жұрттың наразылығын тудырды.