«Жұмыс жоқ»: Депутат халықты мегаполистерге шоғырланбауға шақырды

Мәжіліс депутаты Нұрлан Әуесбаев Алматы облысы, Алматы, Астана және Шымкент қалаларын қоспағанда, басқа өңірлерден халықтың жаппай кетіп жатқанына алаңдаушылық білдірді, деп хабарлайды Orda.kz. 

Депутаттың мәліметінше, алғашқы жарты жылда еліміздің 16 өңірінде тұрғындардың азаюы байқалған. Бұл мәселе әсіресе Солтүстік Қазақстан, Абай және Жетісу облыстарында өзекті болып отыр. Депутат халықтың жаппай көшуі ондаған жылдар бойы жинақталған мәселелердің салдары дейді. 

Әуесбаев мегаполистерде де адамдардың жұмыссыздыққа тап болатынын атап өтті. Соған қарамастан үлкен қалалардағы адам саны жыл сайын артып келеді. Ғалымдардың есептеуінше, Шымкент қаласының демографиялық сыйымдылығы 600 мың адамға жетеді. Ал Алматы — 1,2 миллион адамға арналса, Астанаға — миллион адам сияды екен. 

Депутат аймақтардағы демографияны ынталандыру саясатын әзірлеуді, басым өнеркәсіптік бағытты анықтауды демографиялық саясат тұжырымдамасын жаңартуды ұсынды.