«Жұмыс іздеп барған»: Украинада Ресей жағында соғысқан өзбекстандық бес жылға сотталды

Өзбекстан азаматы Украинада соғысқаны үшін сотталды, деп хабарлайды Orda.kz. 

Өзбекстанның Ферғана облысындағы сот Ресей армиясының жалдамалы сарбазы болған 51 жастағы жергілікті тұрғынды соттады. Әлішер Халықов бес жылға бас бостандығынан айырылды. 

Әлішер Халықов Ресейдің Санкт-Петербург қаласына жұмыс іздеп барған. Кейін Халықов өзіне ақы төлемеген жұмыс берушіні ұрып-соққаннан кейін оны полиция ұстаған. Қылмыстық қудалау қаупі төнген соң Халықов полиция учаскесінде Ресей қорғаныс министрлігімен келісімшартқа қол қойған.

Ресей армиясы екі ай жаттығудан кейін Өзбекстан азаматын соғысқа жіберген. 4 ақпанда ол Украина шекарасынан өткен. Әскери тізбекке дрон шабуыл жасағанда Халықов ауыр жараланып, Мәскеудегі госпитальге түскен. Кейін оған Ресей азаматтығы ұсынылған, бірақ ол одан бас тартып, еліне қайтқан.

Еліне оралған өзбекстандық 5 жылға бас бостандығынан айырылды.