Жүргізуші автобустың қол тежегішін қоюды ұмытып кеткен - Шымкенттегі жол апаты

«Shymkent Bus» компаниясы бүгін Шымкентте болған жантүршігерлік жол апатынан зардап шеккендер мен қаза тапқандардың туыстарына өтемақы төлеуге дайын екендіктерін мәлімдеді.

Бүгін Шымкентте автопарк пен жолаушылар көлігі және автомобиль жолдары басқармасы өкілдерінің қатысуымен брифинг өтті, деп хабарлайды «Отырар» телеарнасы. Оқиғаның мән-жайын белгілі болды. Жүргізуші көлігін қол тежегішіне қоюды ұмытып кеткен болып шықты. Өкілдердің айтуынша, жүргізуші есікті жауып, бір сәтке шығып кеткен, ол  қайтып келгенше автобус еңіспен төмен түсіп үлгерген. Бейнежазбаны қарағанда жүргізуші қол тежегішін жол-көлік оқиғасынан кейін іске қосқаны белгілі болды.

Көлік қызметкерлерінің айтуынша, автобуста техникалық жағынан ақау болмаған. Тиісті бөлім басшысы Мұхтар Қоқанбаев қайғылы оқиғаның себебі адам факторы екенін айтты. Енді көлік компанияларына талап күшейтілмек. Барлық автобус парктерінің басшыларына автобус жүргізушілерін қайта аттестациядан өткізу тапсырылды.

Компания апаттан қаза тапқандар мен зардап шеккендердің отбасыларына өтемақы төлеуге уәде берді.

Бүгін осы апатта зардап шеккен тағы бір адам қайтыс болды. Салдарынан қаза тапқандар саны бес адамға жетті. Қазір тағы бір зардап шегуші - 18 жастағы бойжеткен дәрігерлердің бақылауында.

Оқиға 8 сәуір күні сағат 18:30 шамасында Шымкенттегі Бәйтереков көшесінде болған. Қалалық бағыттардың бірінің автобусы жаяу жүргіншілер өткелінде тұрған адамдарды қағып кетті.