ЖОО-ның 1-2 курс студенттерінің сабақтары кейінірек басталады

Білім және ғылым вице-министрі Қуаныш Ерғалиев брифинг барысында студенттерден ПТР-тест нәтижесін талап етуге болмайтынын хабарлады.

— Алдымыздағы оқу жылында еліміздің жоғары оқу орындарында білім алатын студенттер дәстүрлі форматта оқи бастайды. Жоғары оқу орындарының шешімі бойынша оқуды аралас форматта өткізуге де болады. Дәрістер онлайн, ал семинарлық, зертханалық және тәжірибелік сабақтар офлайн режимде ұйымдастырылады. Ал қашықтан оқыту форматы ерекше білім беру қажеттіліктері бар және тәуекел топтағы студенттерге қатысты қолданылуы мүмкін, – деді Қуаныш Ерғалиев.

Вице-министрдің айтуынша, студенттерге оқу жылының басталуы оқу курсына қарай өзгерістерге мүмкін. Мәселен, 3-4 курс студенттері сабақты 1 қыркүйектен бастаса, ал 1-2 курс және магистранттар үшін оқу университеттің академиялық күнтізбесіне сәйкес қыркүйек айының кез келген уағында  басталады.

— Жоғары оқу орнының аумағы, оқу корпустары, кітапхана мен жатақханаларда міндетті түрде Ashyq қосымшасы қолданылуы керек. Оқу ғимараттарына «жасыл» немесе «көк» мәртебесі бар білім алушылар кіре алады. Оқу ғимараты не жатақханаға кірген кезде термометрмен тексеріп, антисептик қолдану міндетті. Маска режимі де қамтамасыз етіледі. Студенттерден ПТР-тестілеудің нәтижесін талап етуге болмайтынын ерекше атап өткім келеді, – деді ол.