«Жомарт» кенішінде қаза тапқан шахтерлердің тізімі жарияланды

«Жомарт» кенішіндегі апатта қаза тапқан шахтерлердің есімдері белгілі болды, деп хабарлайды Orda.kz.

Қаза тапқандардың тізімі Ұлытау облысы төтенше жағдайлар департаменті тарапынан жарияланды.

• Ақшалов Қайрат Аманбекұлы, 50 жас — насос қондырғыларының машинисі;
• Жақубаев Ардақ Боранбайұлы, 27 жас — тау-кен учаскесінің жер асты шебері;
• Жұмадуллаев Бақытбек Нышанұлы, 50 жас — жер асты кеншісі;
• Кенжебеков Орынбек Әмірханұлы, 34 жас — тиеу-жөнелту машинасының машинисі;
• Молдабеков Ғалымжан Есенбекұлы, 47 жас — бұрғылау көмегіші;
• Нұрұлдаев Олжас Жағалбайұлы, 46 жас — жер асты энергетигі;
• Рожков Константин Владимирович, 33 жас — электрослесарь-монтажник.

Айта кетейік, 17 ақпан күні «Қазақмыс» корпорациясына тиесілі «Жомарт» кенішінде жер асты массасының құлауы орын алды. Апат салдарынан жеті кенші көміліп қалды. Кейін барлығы қаза тапқаны белгілі болды. Алдын ала мәліметтер бойынша, апатқа табиғи газдың жарылуы себеп болған. Қауіпсіздік ережелерін бұзу фактісі бойынша қылмыстық іс қозғалды.

Бүгін Қасым-Жомарт Тоқаев қаза тапқан шахтерлердің отбасыларына көңіл айтты және үкіметке оқиғаны мұқият тергеуді тапсырды. Шахтерлердің туыстарына мемлекеттік қолдау көрсетілетін болады.