«Жомарт» кен орны: Үйінді астынан 7 жұмысшының денесі табылды

«Қазақмыс корпорациясы» ЖШС-не тиесілі кен орнында жүргізілген іздестіру-құтқару жұмыстары барысында жетінші қызметкердің денесі табылды, деп хабарлайды Orda.kz.

Іздестіру-құтқару жұмыстары барысында құтқарушылар «Казахмыс» компаниясының жеті қызметкерінің денесін тапты. Қазіргі таңда, олардың жеке басы анықталып жатыр.

«Барлық жеті жұмысшының денесі жер бетіне шығарылып, сот-медициналық сараптама жүргізу үшін полиция қызметкерлеріне тапсырылды»,  деп хабарлады ҚР ТЖМ.

Айта кетейік, 17 ақпанда Ұлытау облысының Жаңаарқа ауданындағы «Қазақмыс» корпорациясына қарасты «Жомарт» кен орнында тау жынысы опырылып түсті. Салдарынан жеті адам үйінді астында қалды.