Жолдың қақ ортасында намаз оқуға болмайды – мүфтият

Қазақстан мұсылмандары діни басқармасы (ҚМДБ) жамағатқа  намазды арнайы орындарда оқуды ескертті, деп хабарлайды Orda.kz.

Azan.kz  мәліметінше, пайғамбар Мұхаммедтің (с.ғ.с.) өсиетіне сай намаз оқуға болмайтын жеті орынды еске салды. Оған қоқыс тастайтын орындар, мал сою алаңдары, қабір жанында, жол бойында, моншада, мал суаратын жерлерде және Қағбаның төбесі кіреді.

«Жол бойында намаз оқуға тыйым салудың басты себебі — көлік қозғалысына кедергі келтірмеу. Жолды жабу төтенше жағдайлар қызметінің, яғни жедел жәрдем, өрт сөндіру көлігі немесе өз жұмысына асыққан адамдардың қозғалысына кедергі жасайды. Бұл тіпті бірнеше минутқа болса да, кептеліске әкеледі», — деп түсіндірді ҚМДБ өкілдері

Еске сала кетейік, 6 желтоқсан күні Алматыдағы орталық мешіттің маңында жұма намазы кезінде Мәметов көшесінің көлік жүретін бөлігі жабылып, көлік қозғалысы тоқтады. Бұл жағдай жолда кептеліс тудырды. Белгілі болғандай, осы жағдайдан кейін төрт полиция қызметкері жұмыстан босатылған.