Жолды жер жұтқандай: Қаланың қақ ортасы 50 метрге опырылып түсті

Бангкоктың қақ ортасында жол төмен қарай 50 метрге опырылып түсіп, алып шұңқыр пайда болды. Қалада көлік қозғалысы тоқтап, маңайдағы адамдар жаппай эвакуацияланды, деп хабарлайды Orda.kz.

AP мәліметінше, қайтыс болғандар жоқ. Бірақ үш көлікке зақым келгенін Бангкок губернаторы Чадчарт Ситтипунт мәлімдеді. Оның айтуынша, опырылуға жер астындағы жаңа метро станциясының құрылысы себеп болыпты. 

Оқиға орнынан түсірілген видеоларда жолдың беті біртіндеп төмен түсіп, бірнеше электр бағанасын өзімен бірге құлатып, су құбырларын бүлдіргені көрінеді. Шұңқыр үлкейген сайын көліктер шегінуге тырысқанымен ол төрт жолақты көшені толық қиратты. Шұңқырдың бір шеті полиция бөлімшесінің алдына дейін жетіп, ғимараттың жер асты құрылымын ашып тастаған.

Жақын маңдағы аурухана амбулаторлық қызметті екі күнге жабатынын хабарлады. Қала билігі аурухана ғимаратына зақым келмегенін айтты, бірақ полиция бөлімшесі мен басқа да ғимараттардан адамдар эвакуацияланды.