Жолды күтіп ұстауға жауапты лауазымды тұлғалар жауапқа тартылды

2020 жылы 3 мыңға жуық лауазымды тұлға жолдарды күтіп ұстауға қатысты жауапқа тартылды. Бұл туралы ҚР Ішкі істер министрлігінің әкімшілік полиция комитеті төрағасының орынбасары Серік Түсіпов айтты, деп хабарлайды ORDA тілшісі.

«Жаяу жүргіншілердің қауіпсіздігі мәселесі де өткір тұр. Еліміздегі әрбір үшінші жол-көлік оқиғасы, әрбір төртінші өлім-жітім мен жарақаттану - солардың үлесіне тиесілі. Бұған қоса, жаяу жүргіншілердің тәртібіне қатысты да проблема бар. 2020 жылы жол жүру ережесін бұзған 200 мыңнан астам жаяу жүргінші анықталды», - деді ол министрліктің баспасөз қызметі алаңында өткен брифинг барысында.

Оның сөзін, әлемдік тәжірибе бойынша жаяу жүргіншілердің қауіпсіздігін - жүргіншілерге арналған дамыған инфрақұрылым ғана қамтамасыз ете алады. Осыған сәйкес, өткен жылы жол инспекциясы бөлімшелері шамамен 500 мың шақырымды қамтитын автокөлік жолдарында 25 мың зерттеу жүргізді.

«Зерттеу нәтижесі ел жолдарына қосымша 23 мыңнан астам жол белгісін орнату қажеттігін көрсетті. Жол жүрісі қауіпсіздігіне теріс әсер ететін 57,5 мың жол инфрақұрылымы ақауы анықталды. Қызметкерлеріміз оларды жою үшін 25 мыңнан астам ұйғарым шығарып, жолды күтіп ұстауға жауапты шамамен 3 мың лауазымды тұлға жауапқа тартылды», - деді Серік Түсіпов.