Жолдарда полиция бірнеше есе көбейді

5–7 желтоқсан аралығында ІІМ «Қауіпті жүргізуші» жедел алдын алу шарасын өткізеді. Осы күндері жолдарда полицейлердің патрульдері айтарлықтай көбейеді, деп хабарлайды Orda.kz.

Полиция ерекше назар аударатын жағдайлар:

 • жол қозғалысы ережелерін жиі бұзатын жүргізушілерге;

 • заңсыз жолаушылар тасымалымен айналысатындарға;

 • жауапкершіліктен қашуға тырысатын құқық бұзушыларға.

«Ел бойынша жол қозғалысы ережелерін 40 және одан да көп рет бұзған төрт мыңнан астам жүргізуші бар. Сондай-ақ, жалған немесе нөмірсіз көлік жүргізетіндерге, әрі айыппұл төлеуден жалтаратындарға бақылау күшейтілді»,
 деді ҚР ІІМ Әкімшілік полиция комитетінің аға инспекторы Ақтоты Боранова.

Тексеру үшін арнайы мобильді топтар құрылды. Олардың құрамында көлік инспекциясының, мемлекеттік кірістер органдарының және көлік прокуратурасының қызметкерлері жұмыс істейді.

Бүгін Қарқаралы тас жолында Қабанбай батыр және Қызылжар ауылдарының арасында ЖКО болып, автобустың жүргізушісі кабинада қысылып қалып, бірнеше жолаушы зардап шекті, ал экскаватор өртеніп кетті.