Жолда дөрекілік көрсеткен ІІМ магистранты қызметіне қайта оралды

Сот полиция қызметкерлеріне дөрекілік көрсеткен Қостанай ІІМ академиясының магистратурасында оқитын азаматқа қатысты жұмыстан шығару туралы бұйрықтың күшін жойды деп хабарлайды Orda.kz.

Қостанай облысында полиция академиясының магистратура тыңдаушысы жолда патруль қызметкерлеріне балағат сөз айтқаны үшін жұмыстан шығарылған еді.

«Наша газета»  мәліметінше, Алайда сот жүргізілген қызметтік тергеудің заң талаптарына сай болмағанын анықтап, оның құқықтарын қалпына келтірді.

Сот шешімі бойынша, қызметтік тексеріс кезінде заңда белгіленген тәртіп бұзылған. Соның нәтижесінде ІІМ академиясынан Lexus көлігін тізгіндеген тыңдаушыны шығару және оны ішкі істер органдарынан жұмыстан босату туралы бұйрықтар жойылды.

Еске сала кетсек, бұл оқиға 4 ақпанда Қостанай – Әулиекөл – Сұрған тасжолында болған. Премиум санаттағы жол талғамайтын көліктің жүргізушісін жылдамдықты арттырғаны үшін полиция тоқтатқан еді. Алайда ол ашуланып, дөрекі жауап беріп, полиция қызметкерлеріне көлігінің нөмірін «полиция есте сақтап алуы керек» деп айтқан. Оқиғадан кейін полицияның мәліметінше, жүргізушіні жауапкершіліктен босатып жіберген екі патрульдік қызметкер жұмыстан шығарылған.