«Жол сапасына 20 мың шағым»: 6 триллион жұмсалған Қазақстан жолдарының сапасы

Соңғы бес жылда Қазақстанда жолдарды жөндеу мен салуға 6 триллионнан астам теңге жұмсалғанымен, олардың сапасы тұрғындардың наразылығын тудырып отыр, деп хабарлайды Orda.kz.

Сыбайлас жемқорлыққа қарсы агенттік мәліметтеріне сүйенсек, соңғы екі жылда мемлекеттік органдарға жол сапасының төмендігіне қатысты 20 мыңнан астам шағым келіп түскен.

«Мәселен, соңғы 5 жылда жол саласына 6 трлн теңгеден астам қаражат жұмсалды, бірақ бұл жол желісінің жай-күйіне қатысты халық шағымын азайтқан жоқ» деп хабарлады агенттік. 

Қоғам өкілдері бұл мәселені сыбайлас жемқорлықпен байланыстырады. Агенттік мәліметтеріне қарасақ, жемқорлық жолды жоспарлаудан бастап оның құрылысын қадағалауға дейінгі кезеңде жалғасады.

«Биылғы жылдың басынан бері ғана Агенттік осы салада 24 қылмыстық істі тіркеді. Сыртқы талдау жоспарлаудан бастап бақылау мен күтіп ұстауға дейінгі жол құрылысы мен жөндеудің барлық кезеңдерінде жүйелі жемқорлық қаупінің бар екендігін көрсетті. Бастапқы кезеңде проблемалық учаскелер дұрыс анықталмайды, жақында салынған жолдарға қайта жөндеу жұмыстары жүргізіледі. Жобалау кезінде  жұмыс пен материал бағасы сметада шамадан тыс жасанды түрде жоғарылатылады» деп мәлімдеді агенттік.

Сонымен қатар, келісімшарттар көбінесе тәжірибесіз әрі қажетті ресурстары жоқ компанияларға беріліп, техникалық бақылау қызметі міндеттерін тек қағаз жүзінде орындайтыны сапаның нашарлауына ықпал етіп жатыр.

Мәселені шешу үшін Агенттік сыбайлас жемқорлық тәуекелдерін жоюға бағытталған 90-нан астам ұсыныс жасады. Солардың бірі — Атырау облысында бір автожолды орташа жөндеу барысында қаржының жұмсалуын «Цифрлық теңге» жобасы арқылы бақылау, оны қазірдің өзінде сынақтан өткізу басталды.

Дегенмен, бақылау жүйесі мен нормативтік база толық жетілдірілмейінше және жолдардың цифрлық картасы жасалмайынша, Қазақстандағы автожолдар сапасының жақсаруы екіталай.