Жол көрінбейді: Жамбыл облысында не болып жатыр?

Жамбыл облысы полиция департаментінің баспасөз қызметі бейнежазба таратты. Кадрлардан полиция формасын киген үш ер адамның тас жолға шығып, аяғынан әрең тұрғаны көрінеді. Полицейлер жүргізушілерден жолда өте сақ болуды сұрайды.

Жамбыл облысы аумағында екпіні секундына 30 метрге жететін желдің күшеюіне байланысты көлік жүргізу қауіпті, аса сақтық қажет. Жол қауіпсіздігін қамтамасыз ету мақсатында полиция департаменті азаматтарды шақырады:

• ауа райы жағдайын ескере отырып, автокөлікпен ұзақ қашықтыққа сапарларды алдын ала жоспарлауға;
• Құтқару қызметінің хабарламаларына назар аударуға;
• ауа-райы нашарлаған кезде елді мекендерден тыс жерлерде жүруді шектеуге;
• қажет болған жағдайда – баламалы көлік түрін пайдалануға.

– Жамбыл облысындағы елді мекендерден тыс жерлерге шығу қауіпті болуы мүмкін. Сондықтан ауа райының нашарлауына байланысты Қаратау және Жаңатас қалаларынан шығатын жол жабылды. Құтқару қызметінің мәліметінше, 18 қарашаға дейін өңірде қауіп төніп тұр. Желдің екпіні секундына 30 метрге дейін күшейеді. Жамбыл облысының полиция департаменті азаматтарды елді мекендерден тыс жерлерде жүруді шектеуге шақырады, - деп толықтырды баспасөз қызметі.

Ал, әлеуметтік желілерде Таразда түсірілген видеолар пайда болды. Кадрлардан қатты желдің үйлердің шатырын ұшырып әкеткені көрсетілген. Сонымен қатар, шаң мен қарлы боран әсерінен қалада көру мүмкіндігі азайып отыр.

«Қазгидромет» Таразда таңертең оңтүстік-батыстан соққан желдің екпіні секундына 32 метрге жеткенін хабарлады. Ведомство 14 қарашада «стихиялық гидрологиялық құбылыс» дауылды ескерту жарияланғанын атап өтті.

«15 қарашада түнде және таңертең таулы аймақтарда, сондай-ақ 17 қарашада тәулік бойы Жамбыл облысының оңтүстік-батысында және таулы аймақтарында қалың қар күтілді.Таразда 15-18 қарашада түнде және таңертең тұман, 18 қарашада көктайғақ күтіледі. Оңтүстік-батыстан жел соғады, екпіні секундына 23-28 метр, кей жерлерде секундына 30 метр немесе одан да көп болуы мүмкін», - деп хабарлады «Қазгидромет» РМК өкілдері.