Жол инфрақұрылымы көлік апатына тікелей әсер етеді

Ішкі істер министрі Ержан Саденов Қазақстандағы жол инфрақұрылымының күрделі жағдайына назар аударды. Оның айтуынша, республика жолдарының тек 3%-ы ғана қауіпсіздік стандарттарына сәйкес келеді.

Бұл туралы үкімет хабарлады.

«Халықаралық тәжірибе жол инфрақұрылымының апатқа тікелей әсері бар екенін дәлелдеді. Қазір республикалық жолдардың тек 3%-ы ғана қауіпсіздік талаптарына сәйкес келеді. Осындай жолдарды жөндеген соң адам шығыны бірнеше есе азайды», — деді Үкімет отырысында Ержан Саденов.

Биыл жылдың басынан бері жол қауіпсіздігін жақсарту бойынша 24 мыңнан астам нұсқау берілгенімен, жағдай оңалмай тұр. Министр төрт және одан да көп жолақты 6 мың шақырымнан астам жаңа жол салуды шұғыл қажеттілік деп атап, жол қауіпсіздігін қамтамасыз ету мен апаттардың алдын алу үшін осындай шараларды қолға алуды ұсынды.