Жол ережесін бұзып, көлігімен шыр айналған адамды Алматы полициясы жазалады 

Медеу ауданының полицейлері жол қозғалысы ережелерін өрескел бұзған және көлігін бар жылдамдықпен жүргізіп қауіп төндірген азаматты ұстап, жазаға тартты деп хабарлайды Orda.kz.

Құқық бұзушы 21 жастағы жігіт болып шықты. Ол түнгі сағат 1-де BMW автокөлігімен Достық даңғылы мен Сәтпаев көшесінің қиылысында жол ережесін бұзған.

«Жүргізушінің рұқсат етілмеген әрекеттері басқа жол қозғалысы қатысушыларына нақты қауіп төндірді. Құқық бұзушыға бес бап бойынша әкімшілік хаттама толтырылды. Атап айтқанда, ұсақ бұзақылық, қауіпсіздік белдігін тақпау, рұқсат етілмеген жерде айналу, жол жабындысын зақымдау және түнгі тыныштықты бұзу фактісі. Оның автокөлігі арнайы айыппұл тұрағына жөнелтілді», — деді Медеу аудандық полиция басқармасының бастығы Ільяс Өмірсеріков.