Жол ережесін 181 мәрте бұзған жүргізушінің айыппұл мөлшері анықталды

Қызылорда облысының тұрғыны жол ережесін 181 мәрте бұзғаны үшін 3,5 млн теңге айыппұл төлейді, деп хабарлайды ORDA.kz тілшісі.

«Борышкер» іс-шарасы аясында облыстық полиция департаментінің әкімшілік полиция басқармасы қызметкерлері, прокуратура өкілдері және сот орындаушылары бірлескен рейд жүргізді.

Нәтижесінде бірнеше ай бойы жылдамдық арттырып келе жатқан ресейлік нөмірдегі 34 жастағы тұрғынның 181 мәрте жол ережесін бұзғаны анықталды.

«Құқық бұзушылықты автоматты түрде анықтайтын «Аркан» құрылғысы бойынша автокөлікке 2020 жылдың 12 маусымы мен 2021 жылдың 11 ақпаны аралығында 3 млн 591 мың 265 теңге сомасында айыппұл салынған. Сондай-ақ, жүргізуші көлікті сақтандыру құжатынсыз, тек жүргізуші куәлігімен басқарғаны анықталды. Автокөлік айыппұл тұрағына қойылды», - деп мәлімдеді Қызылорда облыстық полиция департаментінің баспасөз қызметі.

Ведомствоның мәліметінше, жергілікті тұрғын салынған айыппұлдарды төлеуі тиіс.

Жүргізушіге ҚР Әкімшілік құқық бұзу кодексінің 612-бабы 1-бөлігімен хаттама рәсімделіп, жиналған құжаттар сотқа жолданды.