Жол қауіпсіздігіне байланысты жаңа жобалар ұсынылды

ҚР Ішкі істер министрлігі жол қауіпсіздігін қамтамасыз етуге байланысты семинар-кеңес өткізді. Бүгінгі күні Қазақстанда  4,3 млн көлік құралы тіркелген. Көліктің көптігіне байланысты  жол-көлік оқиғаларының саны да өсуде.
 
Ішкі істер органдарының статистикалық мәліметтеріне сәйкес, биылғы жылдың 3 айында республикада 2621 жол-көлік оқиғасы болып, салдарынан  363 адам қайтыс болып, 3605 адам жарақат алған. Өткен жылдың осы кезеңімен салыстырғанда қаза тапқандар саны 11,7% -ға өскен.

Жол-көлік оқиғаларының көбі жүргізушілердің жылдамдықты асыруы, қарсы жолаққа шығуы сияқты көлік тәртібінің төмендігінен. Сонымен қатар жол қауіпсіздігіне жолдардың жағдайы мен инфрақұрылымы да  әсер етеді.

Шараға ІІМ Әкімшілік полиция комитетінің басшылығы, Индустрия және инфрақұрылымдық даму министрлігі, «Қазавтожол» ұлттық компаниясы және елдің бірқатар салалық мекемелері қатысты.
 
Семинарда  Алматы, Жамбыл және Шығыс Қазақстан облыстары жолдарында пилотты жобаны іске қосу туралы ұсыныс қаралды. Алдағы уақытта жетілдірілген техникалық шешімдер нақты жағдайларда тексеріліп, қазақстандық жолдардың ерекшеліктеріне бейімделетін болады.  

Ұсынылған жобалар арасында проекциялық және интеллектуалды жаяу жүргіншілер өткелдері, 3D көлемдік форматтағы баламалы және интерактивті жол белгілері бар.