Жол апатында тірідей өртеніп кеткен жүргізуші кінәлі деп танылды

2024 жылдың 24 маусымда Самара — Шымкент тас жолында жан түршігерлік апаттан үш адам қаза болды, көлікте бала болған, деп хабарлайды Orda.kz.

Бұл жол-көлік оқиғасы өткен жылдың ең қорқынышты апаттарының бірі. Toyota Prado мен жүк көлігінің соқтығысуынан жеңіл көлік бірден өртке оранды. Toyota Prado жолаушылары, яғни Әлібек пен Құралай Меңдіғалиевтер және олардың тоғыз жасар немересі Темірлан қаза тапты.

Бүгін Орал қаласында сот отырысы өтті. «Мой город» басылымының жазуынша, сотта айыпталушы ретінде екі жүргізуші де қаралды: жүк көлігін басқарған Жамбыл облысының тұрғыны Двумар Люшанло мен жеңіл көлікте қаза тапқан Әлібек Меңдіғалиев.

«Сот үкімімен Двумар Люшанло ҚР ҚК-нің 345-бабы ("Жол жүру ережелерін бұзу") бойынша ақталды. Ол сот залынан қамаудан босатылды. Сонымен қатар, ақталған тұлғаға реабилитация құқығы берілді»,  деп айтылған сот шешімінде.

Қайғылы оқиғаға кінәлі деп қаза тапқан Әлібек Меңдіғалиев танылды.

«Қазасына байланысты Меңдіғалиев жауапкершіліктен босатылды», деп сот үкімін оқыды сот Асылбек Иманғалиев.

Апат кезінде қаза тапқандардың туыстары сот шешіміне қарсы шағымданатындарын мәлімдеді.