«Жоғары лауазымды тұлға»: Ұлттық ұланның бас қолбасшысының орынбасары ұсталды

Қазақстан Республикасы Ішкі істер министрлігі Ұлттық ұлан бас қолбасшысының орынбасары Константин Воронкиннің ұсталғанын растады. Жоғары лауазымды офицерге қатысты заңсыз әрекет жасады деген күдік туындап отыр, деп хабарлайды Orda.kz.

«Қазіргі уақытта тергеу іс-шаралары ІІМ-мен бірлесе отырып құзыретті органдар тарапынан жүргізіліп жатыр. Министрлік өз қатарында сыбайлас жемқорлықтың кез келген көрінісіне мүлдем төзбейтін қатаң ұстанымын білдіреді»,  деп мәлімдеді ведомство.

ІІМ-нің баспасөз қызметі тергеудің жан-жақты және мұқият жүргізілетінін, әділ тергеу қамтамасыз етіліп, болашақта мұндай жағдайлардың алдын алу мақсатында барлық қажетті шаралар қабылданатынын атап өтті.

Еске сала кетсек, бұған дейін Іле ауданының әкімі Бағдат Қарасаев ұсталған болатын. Orda.kz тілшісі әкімнің Антикор қызметінің назарында болу себебін анықтауға тырысып көрді.