Жоғарғы сот депутат Тұрлыхановтың ұлының үкімін қайта қарайды

Бүгін, 14 мамырда Жоғарғы Сотта Мәжіліс депутаты Дәулет Тұрлыхановтың ұлына қатысты әскери соттың үкімі қайта қаралып жатыр.

Нұрасыл Болатқа екі адамның денсаулығына қасақана орташа ауырлықтағы зиян келтіргені үшін Қазақстан Республикасы Қылмыстық кодексінің 107-бабының екінші бөлігінің 1 және 5-тармақтары бойынша 500 айлық есептік көрсеткіш төлеуге міндеттелді.

Заңгер Анна Чернова мен оның күйеуі Олег Чернов қорғаған жәбірленуші тарап мәжілісменнің ұлына тым жеңіл әрі әділетсіз үкім шығарылды деп санайды.

Чернованың айтуынша, сот Нұрасыл Болат қылмыс жасаған сәтте әскери бөлімнен шығып, антты бұзғаны және мас күйінде болған -  жазаны ауырлататын мән-жайларды есепке алмаған.

«Алдағы уақытта заңға енгізілетін жаңа өзгерістерге сәйкес, осы бап бойынша және ҚР Қылмыстық кодексінің 106-бабы бойынша айыппұл және бас бостандығын шектеу түріндегі баламалы жаза алынып тасталды. Заң шығарушы бұл әрекеттен адам денсаулығының құнсыздануын көріп, бас бостандығынан айыру түріндегі әділ жаза белгіледі. Біздің ісімізде әділдік орнайды деп сенемін! Әлеуметтік жағдайы мен мәртебесіне қарамастан, заң мен сот алдында бәрі бірдей»,- деді Чернова.

Еске сала кетейік, оқиға 2023 жылдың 11 ақпанына қараған түні Алматыдағы сауда орталықтарының бірінің жанындағы көлік тұрағында болған. Шабуылшы қызын және оны жақтауға тырысқан адвокат жұпты ұрып-соққан.