Жоғалып кеткен екі бала табылды

Шығыс Қазақстан облысының полицейлері бір сағаттың ішінде жоғалған балаларды тапты, деп хабарлайды ORDA.kz тілшісі.

Алтай ауданы полиция бөлімінің «102» жедел желісіне 16 наурыз күні сағат 15:39-да екі баланың жоғалғаны туралы хабар келіп түсті.

— Әйел адам сағат 12:00-де мектептен шыққан сегіз жастағы ұлының үйге оралмағанын, қазір қайда жүргені белгісіз екендігін хабарлады. Бұдан бөлек, тағы бір әйел 12.00 шамасында үйден сабаққа шыққан 10 жастағы ұлының мектепке келмегендігі туралы жеткізген. Аталған факті бойынша жедел іздестіру шаралары жүргізілді. Алтай аудандық полиция бөлімінің жеке құрамы дабыл бойынша көтеріліп, жоғалған балаларды іздеуге шықты. Жертөлелер, шатырлар, кәріз шұңқырлары, қараусыз қалған ғимараттар түгел тексерілді, - делінген хабарламада.

Іздеу жұмыстары нәтижесінде, балалар үйден 5 шақырым жердегі Вторушка өзеніне ойнауға барып, қайтар жолда адасып кеткені анықталған. Қазіргі уақытта тәртіп сақшылары балаларды ата-аналарына тапсырды.