«Жібек жолы» кеден бекетінде есірткі заттары тасымалдануда

Мемлекеттік кірістер департаментінің мәліметінше, Түркістан облысы бойынша 2021 жылдың қаңтар және ақпан айында «Жібек жолы» бекетінде төрт бірдей есірткі заттарын алып өтпек болған оқиға тіркелді.

«Жібек жолы» кеден бекетінде департамент қызметкерлері ҚР ҰҚҚ өкілдерімен бірлесе тексеру барысында 1977 жылы туылған Өзбекстан азаматын ұстады. Оқиға 25 қаңтар күні орын алған. Иттердің көмегімен күдіктінің аяғындағы шұлықтарынан айрықша иісі бар өсімдік күдікті зат ретінде алынды.

Ал 8 ақпан күні қызметтік иттің көмегімен 1960 жылы туылған көрші елдің азаматы ұсталды. Оның сырт киімінің қалтасынан полиэтилен пакетіне оралған жасыл түсті иісі бар зат табылған.

Сондай ақ 11 ақпан күні екі бірдей оқиға тіркелді.

1981 жылы туылған Қазақстан Республикасы Маңғыстау облысының тұрғынынан қағазға скотчпен оралған күдікті зат табылса, Тәжікстан Республикасының азаматы іш киіміне жасырынған есірткі затын шекарадан алып өтпекші болған жерінен ұсталды. Полиэтилен пакеттің ішінде ақ қағазға оралған жасыл түсті иісті зат болған.

Жүргізілген сот сараптама жұмыстарының нәтижесінде бұл заттардың бәрі кептірілген марихуана, гашиш секілді есірткі заттар екені анықталды. Қазіргі таңда қылмыстық істер қозғалуда.