Жезқазғанда шенеуніктерге 223 миллион теңгені жымқырды деген айып тағылды

Жезқазған прокурорлары тұрғын үй-коммуналдық шаруашылық, жолаушылар көлігі және автомобиль жолдары бөлімінің жұмысын тексерді.

Тексеру барысында қадағалау органы жылу желілерін қайта құру және жаңғырту кезінде аса ірі көлемде бөтеннің сеніп тапсырылған мүлкін жымқыру фактісін анықтады.

«2021 жылы тұрғын үй-коммуналдық шаруашылық бөлімінің қызметкерлері құрылыс жұмыстарын жоғары бағамен қабылдады. Бұл 223 миллион теңгеден астам бюджет қаражатын негізсіз төлеуге әкеп соқты» деп түсіндірді прокуратура.

Осы факті бойынша облыс прокуратурасы Қылмыстық кодекстің 189-бабы «Сеніп тапсырылған бөтеннің мүлкін иемдену немесе жымқыру» бойынша сотқа дейінгі іс қозғады. Тергеуді Антикор департаменті жүргізеді.