Жезқазғанда әскери бөлім офицерінің аяғына оқ атқан кім?

Жезқазғанда рота командирі оқу-жаттығу полигонында жарақат алды. Оқиғаның қалай болғанын өңірлік «Орталық» қолбасшылығының баспасөз қызметі айтты, деп хабарлайды Orda.kz

12 қыркүйек Жезқазған ұлттық гвардиясының 6505 әскери бөлімінің базасында офицер жарақат алды. Оқиға атыс жаттығулары кезеңінде орын алды. 

«Қауіпсіздік шараларының бұзылуы салдарынан офицер аяғына жеңіл түрде оқтың жанасып ғана өткен жарақатын алды. Оқиға орнында қажетті медициналық көмек көрсетілді. Офицердің жағдайы жақсы әрі қалыпты, өмірлік маңызды органдары зақымданбады», — деп хабарлады баспасөз қызметі.

Қазіргі уақытта оқиғаның мән-жайы анықталып, қызметтік тергеу жүргізілуде.