Жезқазғанда ауруханадағы өрттен бір адам қаза тапты

Жезқазғанның орталық ауруханасында болған өрттен 60 жастағы науқас көз жұмды.

Бұл туралы Orda.kz хабарлайды.

Жезқазған ауруханасында өрт 3 қарашада болғанымен, алайда болған оқиға бүгін ғана белгілі болды.

Қарағанды облысы Денсаулық сақтау басқармасы баспасөз қызметінің мәліметінше, өрт аурухананың төртінші қабатындағы палаталардың бірінде пайда болған. Өрт аумағы 10 шаршы метрді құрады.

«Өрт орнында 1961 жылы туған науқастың денесі табылды. Қылмыстық іс қозғалды. Бүгінгі таңда аурухана штаттық режимде жұмыс істейді. Өрттің шығу себебі анықталуда. Қарағанды облысының Денсаулық сақтау басқармасы қайтыс болған науқастың туыстары мен жақындарына көңіл айтады» деді ведомствода.

Өңірдің ТЖД баспасөз қызметі де жағдайға түсініктеме берді. Ведомствода өрт туралы хабарлама кезекші пультіне 3 қарашада сағат 11:58-де келіп түскенін айтты. Шақыру орнына 24 адам және 7 бірлік техника жіберілді.

«Палатадағы төртінші қабатта 10 шаршы метр алаңда өрт шықты. Өрт орнынан 1961 жылы туған ер адам табылды. Жедел қабылданған шаралардың арқасында өрт 12:21-де сөндірілді. Өрттің себебі мен оның мән-жайы анықталуда» деп толықтырды облыстық ТЖД.