Жетісуда құл саудасымен айналысты деген айыппен қылмыстық іс қозғалды

«Талдықорғандық»  Instagram желісінде Өзбекстан азаматының мәлімдемесі бар видео пайда болды.

Вадим Хамраев есімді азамат Жетісу облысының полицейлері ұрып-соғып, құл саудасымен айналысты деп айыптады. Ер адам Қаратал ауданының учаскелік полиция қызметкерлері одан ақша бопсалап, ұрып-соғып, кейін фермада құлдыққа сатып жібергенін айтты. Осы үшін олар «сатып алушыдан» 6 қошқар мен 200 мың теңге алған.

— Әйелім мен қайын атама мені депортациялады деп айтты. Ал мен мал бағатын фазендада болдым. Кеше қашып кеттмі. Менің екі балам бар. Шаршадым. Мен  барлығына көмектесемін, пешті жағамын, бау-бақша қазамын. Олар мені күнде қорлайды, өлтіреміз деп қорқытады. Осы қиын жағдайдан шығуыма көмектесіңізші. Өтінемін, құрметті Президент!, - деп сұрады шетелдік.

Содан кейін ер адамның денесінде ұрып-соғу белгілері мен тыртықтар байқалған. Бейнежазбаның астында полицияның пікірі жазылған. Олардың айтуынша, іс қазірдің өзінде тергелуде.

«Аталған факті бойынша Қазақстан Республикасы Қылмыстық кодексінің 362-бабының 4-бөлігімен (билікті немесе лауазымдық өкілеттіктерді асыра пайдалану) көзделген қылмыстық іс қозғалғанын хабарлаймыз. Сотқа дейінгі тергеуді ішкі қауіпсіздік басқармасы жүргізіп жатыр. 38 жастағы шетел азаматы болып шыққан видеохабарлама авторы табылып, сұхбат жүргізілді. Аталмыш факті бойынша тергеу барысы облыстық полиция департаменті басшылығының ерекше бақылауына алынды» деп хабарлады Жетісу полиция департаментінің баспасөз қызметі.