Жетісуда бағдарламашы, экс-полицей және медбике жалған медициналық құжаттар сатқан

Прокуратураның үйлестіруімен Жетісу полициясы Талдықорған қаласының үш тұрғынын ұстады, олар ұзақ уақыт бойы әртүрлі өңірлердегі емдеу мекемелері қызметкерлеріне біліктілігін арттырғаны туралы жалған сертификаттар сатып келген.

Медициналық анықтамалар медициналық қызметті жүзеге асыруға және клиникалық практикаға жіберуге (мамандығы бойынша науқастармен жұмыс істеуге) құқық береді және біліктілік санатын береді.

Аталған медициналық құжаттарды қолдан жасап, сатуға облыстық денсаулық сақтау басқармасы бағдарламашыларының бірі, бұрынғы тәртіп сақшысы және жеке медициналық орталықтың медбикесі қатысқан.

«Күдіктілердің жұмыс және тұрғылықты жерін тінту кезінде әртүрлі атпен толтырылған әртүрлі оқу орындары мен медициналық мекемелердің 300-ге жуық біліктілік куәліктері, сондай-ақ олардың қылмыстық әрекетін дәлелдейтін басқа да заттар табылды. Заңсыз әрекеттері үшін ақшалай сыйақылар еліміздің әр өңірінен карталарға аудару арқылы жүзеге асырылған. Қазіргі уақытта ұсталғандар кінәсін мойындады, тергеу амалдары жүргізілуде», - деді Жетісу облысы ПД ұйымдасқан қылмысқа қарсы күрес басқармасының басшысы Сарқытбай Құсайынов.