Жетісу өңірінде ауыл әкімдерін сайлау өтіп жатыр

Облыстың алты ауданында 10 ауылдық округ әкімдерін сайлау өтіп жатыр.

«Жетісу өңіріндегі алты ауданда ауылдық округтердің әкімдері сайланады. Барлығы 37 кандидат ұсынылды. Олардың алтауы әкімнің міндетін атқарушы болса, 31-і өзін-өзі ұсынғандар. Сайлаушылар тізіміне 17 мыңнан астам адам енгізілген» деп хабарлайды Хабар 24.

Сайлау қалыпты өтуде, халық белсенді түрде дауыс беруде.

«Жаңа аурухана, балабақша салынуын күтеміз», «Ауылды көркейтеміз, жұмыс істейміз», «Ауылға ауыз су тартылсын», «Жақсылық, игі істер күтеміз» деп бөлісті сайлаушылар тілшілермен.

Бұл ретте өңірде Мәжіліс пен барлық деңгейдегі мәслихат депутаттарын сайлауға дайындық қызу жүріп жатыр. Облыстық сайлау комиссиясының мәліметінше, кандидаттар тізімінде 531 адам болса, оның 18-і Мәжілісте.