Жетісуда зорлады деп жалған айып тағып, ақша бопсалаған қыздар ұсталды

Жетісу облысында үш қыз «Друг Вокруг» мобильді қосымшасы арқылы ер адаммен танысып, оны өздері тұрған пәтерге шақырған, деп хабарлайды Orda.kz.

Қыздар ер адамды «зорлады деп жала жабамыз немесе 800 мың теңге төлейсің» деп бопсалаған. Бұл қылмыстық топтың мүшелері полиция қызметкерлері тарапынан ұсталды

Ішкі істер министрлігінің хабарлауынша, Б. есімді азамат «Друг Вокруг» мобильді қосымшасы арқылы А. есімді қызбен танысқан. Хат алмасу барысында А. оны өз үйіне шақырған. Алайда көрсетілген мекенжайға келгенде, пәтерде тағы екі бейтаныс қыз болған.

Біраз уақыттан кейін қыздардың бірі оны басқа бөлмеге шақырып, жеке қалуды ұсынған. Ер адам мен қыз бөлмеге кіріп, шешіне бастаған сәтте, кенеттен екі қыз ішке баса-көктеп кіріп, айқайлап, оны кәмелетке толмаған қызды зорламақ болды деп айыптаған.

Алаяқтар ер адамға екі таңдау жасаған: 800 мың теңге беру немесе полицияға арыз жазамыз. Кепілдік ретінде оның жеке куәлігін, техникалық паспортын және жүргізуші куәлігін алып, толық соманы алғаннан кейін қайтаратынын айтқан.

Күдіктілердің қысымынан сескенген ер адам екі рет 50 мың теңгеден берген. Алайда 30 мың теңгені беру сәтінде күдіктілер полиция қызметкерлері тарапынан ұсталған.

Қазіргі таңда тергеу жүргізілуде. Полиция қызметкерлері оқиғаның барлық мән-жайын анықтап, қылмысқа қатысы бар басқа да адамдардың бар-жоғын тексеруде.