Жетісуда құрылыс материалдарын шығаратын жаңа 5 зауыт салынады

Алматы облысында алдағы 2 жылда «Самұрық Қазына Construction» АҚ-ның қатысуымен құрылыс материалдарын өндіретін 5 зауыт салынады, оның 2-еуі Талдықорғанда болады. 

Бұл туралы Алматы облысы әкімінің баспасөз қызметіне сілтеме жасап Orda.kz.  хабарлады.

Өңірге  25 млрд теңге инвестиция тартылып, 600-дей тұрақты жұмыс орны құрылады. Жобаны іске асыру барысы облыс әкімі Амандық Баталовтың «Самұрық Қазына Construction» АҚ басшылығымен кездесуінде талқыланды.

Енді Жетісу өңірінде минералды жылытқыштар, газбетонды блоктар, қасбет плиталары, керамикалық кірпіштер, есік блоктары және ламинатталған еден плиталары өндірілетін болады. Бұл сұранысқа ие құрылыс материалдары бағасының төмендеуіне, отандық нарықты бәсекеге қабілетті жергілікті өнімдермен толықтыруға, сонымен қатар импорт алмасу мәселесінің оң шешілуіне ықпал етпек.

Болашақ зауыттар жылына 7 мың тонна минералдық жылытқыш, 60 мың текше метр газды блоктар, 2 млн шаршы метр ламинатталған еден плиталары, 1,5 млн шаршы метр қасбетке арналған фиброцемент плиталарын шығарады деп жоспарланып отыр.