Жетісу өңіріндегі ұйғыр және орыс атаулары өзгерді

Қазақстанда бірнеше елді мекендер мен көшелердің атауы өзгертілді. Бұл туралы Жетісу облысы мәслихатының депутаты Гүлназ Мұстафа Facebook парақшасында жазды, деп хабарлайды Orda.kz.

Панфилов ауданындағы бұрын Пенжім деп аталып келген елді мекен енді Атамекен деп аталады.

Сонымен қатар, сол өңірдегі екі ауыл бұрынғы атауы қайтарылды: Лесновка ауылы  – Талды, Әшім ауылы –  Төңкеріс болып өзгерді.

«Облыс тұрғындарының пікірін ескере отырып, облыстық ономастикалық комиссия қорытындыға келіп, оның негізінде Жетісу әкімдігі қаулы шығарды, ал мәслихат шешім қабылдады»,  деп түсіндірді Гүлназ Мұстафа.

Сонымен қатар Талдықорғандағы кейбір көшелер мен аудан атаулары да қалыпқа келтірілді:

• 9-шағын аудан – «Құлагер»,

• 10-шағын аудан – «Әл-Фараби»,

• Ворошилов пен Невский көшелері Нұрғиса Тілендиев пен Әбділхақ Әбіхалық  көшелеріне айналды.

Ал «Шайқорған» және «Балауыз» елді мекендеріндегі бұған дейін санмен аталып келген көшелердің барлығына да жаңа атаулар берілді.