Жетісу өңірінде металлургиялық зауыт салынады

Жоба құны – 1,3 трлн теңге.

Жетісу өңірінде қуаттылығы жылына 860 мың тонна мыс концентратын шығаратын металлургиялық зауыт құрылысының ірі жобасын жүзеге асыру басталды. 

Бұл туралы Орталық коммуникациялар қызметінде өткен брифингте облыс әкімі Бейбіт Исабаев мәлім етті, деп хабарлайды Orda.kz тілшісі әкімдіктің баспасөз қызметіне сілтеме жасап.

Жобаның құны 1,3 трлн теңге, компания 2 мыңнан астам жұмыс орнын құруды жоспарлап отыр.

Қазіргі уақытта жабдықтар мен тауарларды сақтауға арналған қоймалар мен басқа да техникалық үй-жайлардың құрылысы аяқталды. Зауыт құрылысы 2025 жылы басталып, 2027 жылы аяқталады.

Жобаны «Consolidated Construction Mining Company» ЖШС жүзеге асыруда.

Жалпы, Бейбіт Исабаев мәлім еткендей, облыстың 2030 жылға дейінгі инвестициялық қоржынында 9 мыңнан астам жұмыс орнын құрумен 2,2 триллион теңге болатын 184 жоба бар.

Бұған дейін Премьер-Министр Әлихан Смайылов Қазақстанға тікелей шетелдік инвестиция тарту және жаңа инвестициялық жобаларды жүзеге асыру жұмыстары туралы айтқан болатын.

 «Өткен жылы біздің тікелей шетелдік инвестиция көлемі соңғы 10 жылдағы рекордтық деңгейге жетіп, 28 миллиард долларды құрады. Бұл инвестициялар бірінші кезекте тау-кен металлургия кешеніне, өңдеу өнеркәсібіне, саудаға, көлік пен қаржы секторына бағытталды», - деді Әлихан Смайылов.