Жетісу облысының 2024-2026 жылдарға арналған бюджеті бекітілді

Бюджеттік қаражаттың 60 пайыздан астамы әлеуметтік салаға бағытталады

Жетісу облысы мәслихатының кезекті сессиясында 2024-2026 жылдарға арналған бекітіліген бюджеті  1,5 триллион теңге болды. Оның 506,6 миллиард теңгесі 2024 жылға арналған облыстық бюджет. Бюджеттік қаражаттың басым бөлігі (60,2%) әлеуметтік салаға бағытталады, деп хабарлайды Жетісу облысы әкімінің баспасөз қызметі.

«Бүгінгі сессияға дейін облыс бюджетінің жобасы облыстық мәслихаттың жұмыс тобы мен тұрақты комиссия отырыстарында бірнеше рет қаралып, депутаттардың ұсыныстары мен ескертпелерін ескере отырып пысықталды. Әрбір сала бойынша бюджеттік өтінімдерді қарау кезінде бірінші кезекте қаржының тиімді және мақсатты жұмсалуына баса назар аударылды», - деді облыстық мәслихаттың төрайымы Гүлнәр Тойлыбаева.

Облыс әкімінің орынбасары Әсет Қанағатов білім саласына 204,4 млрд теңге, оның 121,6 млн теңгесі шалғай ауылдардағы 68 мектепті Starlink желісіне қосуға, 18,3 млрд теңге денсаулық сақтау, әлеуметтік салаға бағытталу жоспарланғанын айтты. қауіпсіздікке – 32,6 млрд теңге, мәдениетке – 14,7 млрд теңге және спортқа – 27,2 млрд теңге бөлу жоспарланып отырғанын айтты. Сондай-ақ, қолжетімді тұрғын үй құрылысына 6,3 млрд теңге, халықтың әлеуметтік осал топтары үшін тұрғын үй сатып алуға тағы 3,3 млрд теңге бөлінді.

«Ауыл шаруашылығы саласында 2024 жылға арналған бюджетте шаруа қожалықтарын субсидиялауға 22,2 млрд теңге қарастырылған. Ауыл шаруашылығы тауарын өндірушілерді қолдауға республикалық бюджеттен қосымша 10,5 млрд теңге бөлінді. Оның ішінде «Ауыл аманаты» бағдарламасы бойынша ауыл тұрғындарына жылдық 2,5 пайызбен шағын несие беруге 3,5 млрд бар. Сондай-ақ, агроөнеркәсіптік кешен субъектілеріне ірі жобаларға жеңілдетілген несие беруге 7 млрд теңге бөлінді», - деді Әсет Қанағатов. 

Үздіксіз сумен, жылумен және газбен қамтамасыз ету, жергілікті автомобиль жолдары желісін жөндеу және қайта жаңарту, сондай-ақ қоғамдық қауіпсіздікті қамтамасыз ету, құқық тәртібін сақтау, төтенше жағдайлардың алдын алу және жою шаралары басым бағыт болып қала береді.