Жетісу облысында лицензиясыз жұмыс істеген дәрігерлерге айыппұл салынды

Аймақтың Қаратал ауданында жаппай заң бұзушылықтар анықталды, деп хабарлайды Orda.kz.

Белгілі болғандай, кейбір дәрігерлердің медициналық қызметпен айналысуға қажетті мамандар сертификаттары мен лицензиялары болмаған.

«Әкімшілік жауапкершілікке 20 адам тартылды, оның ішінде үш басшы бар, олар аудандық орталық аурухананың бас дәрігері мен оның орынбасарлары» деп жазылған Жетісу облыстық прокуратурасының хабарламасында. 

Дәрігерлерге салынған айыппұлдың жалпы сомасы төрт миллион теңгеден асты. Тағы төрт медицина қызметкеріне екпе егу ережелерін бұзғаны үшін 157 мың теңге айыппұл салынды.

Бұдан басқа, бюджетке 12,8 миллион теңге қайтарылды.

Денсаулық сақтау министрлігі жүргізген тексеріс барысында заңсыз 400-ден астам процедуралық кабинет  анықталды. Кабинеттер лицензиясыз, рұқсатсыз және құжатсыз жұмыс істеп, пациенттердің денсаулығына қатер төндірген.