Жетісу облысында анасы екі миллион теңгеге балаларын сатып жіберген

Жетісу облысы полицейлері екі баласын екі миллион теңгеге сатқан әйелді ұстады.

Бұл туралы Ішкі істер министрлігінің ресми өкілі Шұғыла Тұрлыбек хабарлады.

23 жастағы ана делдалдар арқылы сатып алушыларды іздеген. Ол әлі бір жасқа да толмаған бірінші баласын 2022 жылдың қазан айында сатқан. Екіншісін туа сала осы жылдың тамыз айында сатқан. Әйел әр сәби үшін миллион теңге сұраған.

«Облыстық Ұйымдасқан қылмысқа қарсы күрес басқармасының қызметкерлері бала саудасымен айналысқан Жетісу ауданының тұрғынын ұстады, фактілер ҚР Қылмыстық кодексінің 135-бабы «Кәмелетке толмағандарды саудалау» бойынша тіркелді»,- деді Тұрлыбек.

Ол сондай-ақ «STOP Трафик» ауқымды операциясы аясында Қазақстанда адам саудасына қатысты барлығы 30 қылмыс анықталғанын, оның үшеуі балаларды сатуға қатысты екенін атап өтті.