Жетісу облысында ағыс алып кеткен ер адам іздестіріліп жатыр

Қайғылы оқиға 10 мамыр күні Жетісу облысы Кербұлақ ауданындағы Көксу өзенінде болды, деп хабарлайды Orda.kz.

Әлеуметтік желіде ер адамның тартылған темір арқан арқылы өзеннен өтпек болған сәті түскен бейнежазба тарап жатыр. Жігіт арқанның ортасына жеткенде тепе-теңдігін жоғалтып, өзенге құлап кетеді. Ер адамды қатты ағыс алып кеткенін полиция растады. Оқиға бойынша қылмыстық іс қозғалды.

«Алдын ала мәлімет бойынша, ер адам тартылған арқанмен өзеннен өтпек болғанда құлап кетіп, қатты ағысқа батып кеткен. Оқиға орнына полиция, әскерилер, құтқарушылар, басқа да мекемелер мен еріктілер жұмылдырылып, ауқымды іздестіру жұмыстары жүргізілуде. Құтқару операциясы әлі жалғасып жатыр», деп хабарлады полиция департаменті.

Облыстық Төтенше жағдайлар департаменті (ТЖД) іздестіру жұмыстары жайлы былай деді:

«11 мамыр күні таңғы сағат 06:30-дан бастап ауқымды іздестіру жұмыстары ұйымдастырылды. Оған ТЖД қызметкерлері, орман шаруашылығы, жергілікті атқарушы органдар, полиция, әскери полиция және Қорғаныс министрлігінің бөлімшелері жұмылдырылды»,  деп айтылған хабарламада.

Іздеуге 98 адам және 22 техника, соның ішінде жүзу құралдары, дрондар мен спутниктік байланыс тартылды. Сол күні сегіз топ өзен жағалауын 35 шақырымға дейінгі аумақта тінтіп шықты, бірақ нәтиже болған жоқ. 12 мамырда іздеу жұмыстары қайта жалғасады. Белгілі болғандай, жоғалған азамат 1989 жылы туған.