Жетісайда әйелін ұрып өлтірген адамның ісін сот қарай бастады

Түркістан облысы Жетісай аудандық соты әйелін ұрып өлтірді деген күдікпен қамауға алынған 32 жастағы Айбек Айкөзовтің ісін қарай бастады. Марқұмның туыстары соттан оған қатаң жаза беруді сұрайды.

Сот кабинеті жүйесіндегі мәліметке қарағанда, Айкөзов Қылмыстық кодекстің «Денсаулыққа қасақана ауыр зиян келтіру» бабымен (106-бап) күдікке ілінген. Ол Шымкенттегі Сәуле ықшам ауданында орналасқан ИЧ-167/11 түзеу мекемесінде қамауда жатыр.

Істі судья Марат Күздеубаев қарауда.

Айбек Айкөзовтің адвокаты Исақожа Айдардың айтуынша, оқиға маусым айында өз үйінде болған. Түнде ішімдік ішіп келген Айкөзов әйелі Әйгерім Айкөзованы ұрып-соққан. Ауыр соққыдан жарақат алған әйел аудандық аурухананың жан сақтау бөліміне түсіп, бір аптадан соң есін жинай алмай қайтыс болған.

«Марқұмның туыстары істі «Денсаулыққа қасақана ауыр зиян келтіру» бабымен емес, «Адам өлтіру» бабымен қарауды талап етіп отыр» деді адвокат.

Айбек пен Айгерімнің ортақ үш баласы бар.

Айбек Айкөзовтің тағылған айыппен келісетіні, не келіспейтіні белгісіз.

Марқұмның інісі, сотта заңды өкілі деп танылған Нұрбек Айтмағамбетовтан пікір алу мүмкін болмады.

Бұған дейін Түркістан облысы Ордабасы ауданында ер адам балаларының көзінше әйелін ұрып өлтірген. Облыстық қылмыстық істер жөніндегі мамандандырылан ауданаралық соты оны 17 жылға бас бостандығынан айырған.

Авторы: Дилара Иса, Шымкент