Жетінші қола: Дархан Асаділов француздан ұтылып қалды

Қазақстандық каратэші Дархан Асаділов Токиодағы Олимпиада ойындарында елге жетінші медалды әкелді.

Бұл туралы Orda.kz хабарлады.

Ол 67 келіге дейінгі салмақ дәрежесінде қола жүлдегер атанды. Асаділов жартылай финалда әлем чемпионы және Еуропаның үш дүркін чемпионы француз Стивен Да Костамен жұдырықтасып, одан 2:5 есебімен ұтылды. Осылайша Дархан жарыстың қола жүлдегері атанды.

Бұған дейін Асаділов түрік Ерай Самданды, әзірбайжандық Фирдовси Фарзалиевті, жапондық Наото Согоны және мысырлық Али Элсавиді ұтқан.

Еске салсақ, бұл Қазақстанның жетінші қола медалі: бұған дейін дзюдошы Елдос Сметов, ауыр атлеттер Игорь Сон мен Зульфия Чиншанло, боксшылар Қамшыбек Күнқабаев пен Сәкен Бибосынов пен балуан Нұрислам Санаев қола иемденген.